Ilulissani mittarfissap qaqugu ammarnissaa nalornissutaasoq
Nuummi mittarfissap atoqqaartinneqarnissaanut ulluliineq Kalaallit Airportsimiit nuannaarutigineqartoq, Ilulissani qaqugu nalliuttorsiortoqassanersoq mittarfimmik ingerlatseqatigiiffiup nalornissutigaa.
2024-mi novembarip 28-ani Nuummi mittarfittaassaq ammassaaq. Nalliuttorsiutaarujussuassaaq. Illuatungaanili Ilulissani mittarfittaassap ammarneqarnissaata ullulernissaanut Kalaallit Airports piareersimanngillat.
2024-p naalernerani piareereersimanissaa pisortatigoortumik nalunaarutaanikuuvoq, sanaartornermili ajornartorsiortoqarpoq, aaqqinnissaanullu tamaviaarluni sulisoqarpoq.
Kinguaattooqqalaartut
- Ilulissani sanaartornermik suliniut ajoraluartumik piffissamut pilersaarutaasumut sanilliullugu kinguaattooqqavoq, Kalaallit Airportsimi attaveqatigiinnermut pisortaq, Mikkel Bjarnø Lund, Sermitsiaq.AG-mut ilisimatitsivoq.
Aappaagu naammassineqarnissaanut mittarfinnik ingerlatseqatigiiffik suli neriuutaarutinngilaq.
- Sanaartugassanik suliakkernikuusavut aaqqiissutaasinnaasut piffissaliussallu nutarsarnissaat pillugit oqaloqatigivagut, sulili anguniagaq tikinngilarput, Mikkel Bjarnø Lund oqarpoq.
