Timmisartuutileqatigiiffiit nunanit tamalaaneersut Nuummi Ilulissanilu mittarfinnut timmisartuussisarnissaat anguniarlugu inissanik, neriniartarfinnik takornarianullu aaqqissuussanik amerlanerusunik pisariaqartitsisoqartoq, Kalaallit Airports A/S-imi pisortaaneq Jens Lauridsen oqarpoq.

- Tamannalu maannakkut pitsanngorsarneqarsinnaavoq, mittarfiup pisortaa qanittukkut Sermitsiaq.AG-mut oqarpoq.

Atlantikuli qulaallugu timmisartuussinernut nutaanut Kalaallit Airports qanoq naatsorsuuteqarnersoq Kommuneqarfik Sermersuumi inuussutissarsiornermi pisortap Mads-Daniel Skiftep akissutissarserusuppaa, taamaalilluni tamanna naapertorlugu piareersartoqarsinnaaniassammat.

Unammillernartoq

- Unammillernartoq tassaavoq suut ilimagisinnaanerivut, tunngavissaqarnersorlu ilisimatinnagu kina aningaasaliinissamut sapiissuseqassanersoq, Mads-Daniel Skifte Sermitsiaq.AG-mut oqarpoq.

Naatsorsueqqissaartarfiup Sermitsiaq.AG-mut naatsorsuinerata takutippaa nuna tamakkerlugu mittarfiit nutaat 2018-imi sanaartorneqarnissaat aalajangiunneqarmalli inissat 22,5 procentinik amerlisimasut.

Sumi akunnittarfiit unnuiffissallu amerlanerusut sanaartorneqarsimanersut sumiiffinni assigiinngitsuni assigiinngilluinnarput. Sermersuup Kitaani 2018-imi akunnittarfiit 98.550-iusut 2022-mi 172.280-iupput. Tassa 75 procentimik amerleriarput. Ilulissani 40 procentimik amerleriarput.

Grønlands Statistik

Naammappalli, inuussutissarsiornermut pisortaq aperivarput.

- Tamanna akiuminaalluinnarpoq. Immaqa Nuup eqqaani marloriaammik pisariaqartitsineq eqqartorneqarpoq. Kisianni nalulluinnarpara, inuussutissarsiornermut pisortaq oqarpoq, umiarsuarnillu takornariartaatinik angallassisut arlallit tikittussat ilaasussat taarsersorneqarnissaat Nuummi pissasoq nalunaaruteqartartoq tikkuarlugu, silarlulerneranilu takornariat unnuiffissaqarnissaat pingaaruteqartoq.

Pissutsit pitsanngorsarneqarnissaat

Takornarialerisunut takornarianullu kajungernarnerulersinniarlugit kommunip avatangiisaasa pitsaanerulersinnissaat kommunip pingaarnertut anguniagarigaa nassuiaavoq.

- Assersuutigalugu Kangerlummi, assersuutigalugu Kapisilinni Qooqqunilu, umiatsiat tulaffissaalluarsinnaanissaat, takornariat angallatitik angallatigigaangamikkit isumannaatsumik ajornanngitsumillu nunamut tulassinnaaniassammata. Aammattaaq pisuttuartarfiliornissaq pingaartipparput, Mads-Daniel Skifte kommunip suliniutaanut assersuutitut oqarpoq.

Takornariartaatit maannakkut naammaginartumik amerlassuseqartut, takornarianulli sammisassaqartitsinerit aaqqissuussinerillu ineriartortinneqartariaqartut naliliivoq.

Visit Greenlandip pisortaata Anne Nivíka Grødemip siunissami inissat qanoq amerlatigissanersut oqaatigisinnaanngilaa.

- Takornariaqarnerup qanoq ineriartortinneqarnissaa, soorlu akunnittarfiit, borgmesterinut inuussutissarsiornermiluunniit siunnersuisoqatigiinnut apeqqutigineqassaaq. Soorunami takornariaqarnerup qanoq ineriartortinneqarnissaanik najukkami kissaatigineqartumut naleqqiullugu annertunerusariaqartoq, Anne Nivíka Grødem Sermitsiaq.AG-mut oqarpoq nangillunilu:

Piujuartitsilluni aallariarneq

- Visit Greenlandip takornariaqarnerup ineriartortinneqarnissaanut isumaa tassaavoq, tamanna piujuartitsisumik aallariarnikkut pissasoq, taamaalillunilu aningaasaqarnermut, inuiaqatigiinnut avatangiisinullu tunngasut eqqarsaatigineqassapput. Takornariat kissaatigisaannik naatsorsuutaannillu, ornitassap pisariaqartitaannik inuussutissarsiortullu neqeroorutigisinnaasaannik oqimaaqatigiissaarinissamik tamanna ilaatigut imaqartariaqarpoq. Nuna tamakkerlugu takornariaqarnermut siunnersuisoqatigiittut nunap immikkoortuani qanoq ineriartortitsisoqarnissaanik takorluuineq sinaakkutissanillu aalajangersaanissaq suliassarinngilarput, ilisimasanilli, siunnersuinermik oqaloqatiginninnermillu nunap immikkoortuini periusissiornermut atorneqarsinnaasunik tunniussaqarnissarput suliassarivarput.