Qamuteralannik aquttut ajornartorsiortut annaanneqarput
Arfininngormat Tasiilap eqqaani qamuteralannik aquttut marluk silarlussiortut ikiorniarlugit SAR-imik suliaqartoqarpoq.
Arfininngormat ualikkut nalunaaqutaq 15.36 qamuteralannik aquttut marluk Tasiilap eqqaani sermersuarmi nikeriarsinnaajunnaarnertik anorersualilerneralu pillugit ajunaalernermik kalerrisaarisariaqarsimapput.
Kalaallit Nunaanni Politiini pigaartut pisortaat Carl Sværd Sermitsiaq.AG-mut taamatut oqaluttuarpoq.
Ajornartorsiortut taakku marluk ikiorniarlugit politiit qatserisartut suleqatigalugit SAR-imik suliamik aallartitsipput.
Inuit katillugit tallimat — politiit marluk, qatserisartut marluk namminerlu kajumissutsiminik ikiuisoq ataaseq — Tasiilamit qamuteralannik ajornartorsiortut sumiiffianut aallarput.
Carl Sværdip nuannaarutigaa qamuteralannik aquttut marluk nassaarineqarlutillu aniguisinneqartut, naak silarlulluni nittaarujussuaraluartoq.
Arfininngormat unnukkut nalunaaqutaq 20.30 annaassiniartut qamuteralannillu aquttut marluk ajunngitsut Tasiilamut apuupput.
