Polar Seafood mittarfissat pillugit: Timmisartukkut nassiussinermi periarfissanik soqutiginartoqarpoq
Nuummi ataatsimeersuartoqarnerani mittarfissat ukkatarineqarput.
![](/sites/default/files/styles/930x500/public/media/1_miki_d5a2785.jpg?itok=IQd68vFf)
Nuna Advokaterip aamma Horten Advokatpartnerselskabip ukiumoortumik Kalaallit Nunaanni ataatsimeersuartitsinerani Nuummi peqataasut aatsaat taama amerlatigipput, maanna Ilulissani, Qaqortumi Nuummilu mittarfissat nutaat kiisalu taakku malitsigisaannik periarfissat ilungersunartullu ukkatarineqarput.
Aviisi Sermitsiaq taama allappoq.
Mittarfiit nassiussinermi periarfissanik nutaanik pilersitsisinnaasut, Polar Seafood Greenland A/S-imi pisortap, Miki Brønsip takusinnaavaa, pingaartumik Kalaallit Nunaata aamma Nuup timmisartumik nassiussinermut tikitassatut soqutigineqaleriartornera ilutigalugu. Tassani aalisakkanik suliarineqanngitsunik nioqqutinik timmisartukkut avammut tunisinermut tunngatillugu periarfissaqarlunilu ilungersunartoqarpoq.
- Polar Seafood suliffeqarfiuvoq aaqqissuussaanikkut mikisoq, taamaammat timmisartumik nassiussineq uagutsinnut allatut pisariuvoq, kisianni periarfissanik soqutiginartunik takusaqarsinnaavugut, Miki Brøns oqarpoq.
Suliffeqarfik ukiumut aalisakkanik qalerualinnillu qerisunik 40.000 tonsit missaanniittunik Kalaallit Nunaannit imaatigut assartukkanik avammut tunisisarpoq.
Assartuinermi akit appasinnerusut neriuutigigaat
Maanna assartuinermi akit Nuummiit Københavnimut kiilumut 60-65 koruunit missaanniipput, Islandimit Danmarkimut kiilumut akit 20 koruunit ataakaat.
Maanna Nuummi kiilumut assartuinermut akigitinneqartoq ilungersunartuuvoq, pingaartumik imaatigut assartukkanut aningaasartuutinut kiilumut 2 koruunit missaanniittunut sanilliutissagaanni.
- Inissisimaffik pisariuvoq, akillu assigiinngissutaannik pisisartutta akiliuteqartinniarnerat ajornakusoorpoq. Taamaakkaluartoq mittarfinnik suliniutit naammassineqarnerisa kingorna akit appasinnerunissaat neriuutigaarput. Nioqqutitta Nuummiit aallarullugit Skandinaviami niuerfinnut anngunnissaat pingaarnerut anguniagaraarput, Miki Brøns oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: