Nitter: Kangerlussuaq nuannarinerpaavarput
Nuummi mittarfissaq nutaaq piareerpat, silalli pissutigisaanik timmisartut angisuut missinnaanngippata, Kangerlussuarmi mittarfik pitsaanerpaassaaq, Air Greenlandip pisortaanera Jacob Nitter Sørensen oqarpoq.
Nuuk timmisartuussiffigineqarsinnaajunnaassappat mittarfik Kangerlussuarmittoq, Ilulissaniittoq (piareerpat, aaqq.) imaluunniit Keflavik Islandimiittoq sorleq atorneqarsinnaanersoq Air Greenlandip pisortaanerata qularutiginngilaa.
- Timmisartut Boeing 737-t Airbus 320-llu naappallaanngitsut eqqarsaatigalugit Kangerlussuaq pitsaanerungaassaaq, AG-mi pisortaaneq oqarpoq nangillunilu:
- Keflavik mittarfittut allatut atussagutsigu nunat tamalaat akornanni timmisartuussinerni timmisartut angallassivallaannginnerusut orsussaqartinnissaat akisuallaassaaq. Timmisartullu immikkut ittut atorneqassappata ilaasut amerlassusaat killeqarsinnaapput, tamannalu isertitaqarnermut sunniuteqassaaq. A33-t Tuukkarlu malussarinnginnerusarput, taamaattumillu ullormut Kangerlussuup, Keflavikkip Københavnilluunniit akornanni timmisartuussinermi timmisartup sorliup atornissaa aalajangiisuussaaq.
Iluarsaassineq
Taamaattumik Kangerlussuup mittarfittut allatut toqqarneqarnera pisortap iluaqutaasorujussuusorivaa, mittarfiup inissisimaffia pissutigalugu, aammali mittarfiup atornissaanut silap qanoq issusiata akornutaavallaartannginnera pissutigalugu.
Kangerlussuarmi mittarfiit iluarsaanneqartussaapput. Tamanna ajornartorsiutaassanngila?
- Piffissap ilaani immaqa allamik periarfissarsiortariaqassaagut, siunissarli ungasinnerusoq eqqarsaatigalugu mittarfik taanna pitsaanerussaaq, Jacob Nitter Sørensen Sermitsiaq.AG-mut oqarpoq.
