Naviairip Nuummi inissisimanera iluarsineqarpoq
Naviairip Nuummi mittarfiup eqqaani suliffeqarfimmik pilersitsiniarnerani, timmisartoqarfissap nutaap, Eqalugalissuit tasiat sisorarfiillu majuartaataasa eqqaani inuussutissarsiornermut pilersaarut allanngortinneqarsimavoq. Taamaattoqarnissaali qularnarpoq.
![](/sites/default/files/styles/930x500/public/media/skaermbillede_2023-12-21_kl._07.33.55.png?itok=y-lJzH5i&c=378361af8d386dcb7bb9d426f9913ab4)
Kalaallit Nunaata silaannartaani aqutsineq 2031-miit angerlartinneqassaaq, mittarfiullu eqqaani mittarfeqarfiit ingerlatseqatigiiffiata allaffeqarfiata eqqaaniittumi mittarfiup aqutsisoqarfia inissinneqassasoq Naviarip kissaatigaa, Kommuneqarfik Sermersuup kommunimut pilersaarummut tapiliussami mittarfiup eqqaani inuussutissarsiorneq pillugu tusarniaanermut akissummi allassimavoq.
Iluaqutissarpassuit
- Nuup mittarfiani ACC-p illutaa iluaqutissartaqarlunilu suleqatigiinnermut sunniuteqassaaq, pingaartumik timmisartuussinermi KAIR-imik aammali timmisartortitseqatigiiffinnik soorlu Air Greenlandimik suleqateqarnerup nukittorsarneqarneratigut, Naviair ilisimatitsivoq.
![](/sites/default/files/styles/article_half_width/public/skaermbillede_2024-02-26_kl._06.15.29.png?itok=NJTUyq3t)
Nunap assingani (talerperleq, aaqq.) sanaartorfik F allanngortinneqarpoq Naviairip kissaataanut naapertuuttumik marlunnut avillugu (F1 aamma F2, aaqq.), taamaalilluni Naviair sanaartorfimmi F1-imi inissippoq. Nunaminertaq C KAIR-ip allaffeqarfianut atorneqartussaavoq, taamaalillunilu Naviair-ip siunnersuutaa ingerlatsivimmit akuerineqarpoq.
Naviairip kissaataa piviusunngussanersoq qularnarpoq, Naalakkersuisummi Naviairip Nuup avataani inissisimanissaanik kissaateqarlutik danskit naalakkersuisuinut saaffiginnissimammata.
Suliffinnik siammarteriniartut
- Taamatut kissaateqartoqarneranut Poulsenip innersuussutigaa Naalakkersuisut kissaatigisarigaat ingerlatsiviit inuiaqatigiinnut pingaarutillit nunatsinni siammarlugit inissinneqassasut suna tamaat Nuummi katersuutsinnagu, tassungalu ilassutigaa sillimaniarneq eqqarsaatigalugu tamanna isumatusaarnerussasoq, nunarput arlaannaatigulluunniit sillimaniarnikkut navianartorsiortinneqalissagaluarpat siammasissumik aaqqissuussaaneq isumannaannerussammat, Ineqarnermut Attaveqaqatigiinnermullu Naalakkersuisup Hans Peter Poulsenip (S) oqaaseqaatai tunngavigalugit Sermitsiaq.AG-mi qaammat ataaseq matuma siorna allaaserisaqarpoq.
Taamanikkut Hans Peter Poulsen oqarpoq danskit naalakkersuisui nunatsinni naalakkersuisut kissaataannut tassunga tusaaniarluarsimasut aammalu danskit naalakkersuisuisui ilimasaarisimasut ukiaru pilersaarutinik tigussaasunik Naalakkersuisunut apuussiumaarlutik.
Naviairip tusarniaanermut akissutaa siorna novembarimi tunniunneqarpoq, februaarillu 20-ani Kommuneqarfik Sermersuumi Aningaasaqarnermut Inuussutissarsiornermullu Ataatsimiititap inuussutissarsiornermut tunngasumik kommunimut pilersaarummut tapiliussaq inaarutaasumik akuersissutigaa.