Namminersorlutik Oqartussat nuna tamakkerlugu qillerinikkut qaqitanut toqqorsivimmik pilersitsiniarput
Aatsitassanut Naalakkersuisoqarfiup nassuerutigaa qillerinikkut qaqitat annertuut qanga suliniutineersut piiaaffitoqqaniittut, taamaattumillu ilisimatusartunit suliffeqarfinnillu allanit pissarsiarineqarsinnaanngitsut. Nuna tamakkerluguli toqqorsivimmik pilersitsiniarluni suliniuteqartoqarpoq.
Ukiuni 100-ni kingullerni 1.000 kilometerit missiliorlugit qillerinikkut qaqitat takissuseqartut, qillerinerit 7.000-it missaanni qaqinneqarsimasut, GEUS-imi ilisimatusartut siornatigut maannakkullu sulisartut, Kalaallit Nunaanni niuernikkut ilisimatusarnikkullu qillerinermik misissuinerisa takutippaat.
Taamak allaaserinnippoq aviisi Sermitsiaq.
Nunap assinga inissinneqareersoq, qillerinikkut qaqitat tulliullugit sumiinneri paasiniarnissaat pissusissamisoorpoq. Tamannali ajornaatsuinnaanngilaq. Ilarpassuit tammarsimapput imaluunniit nunani allani aatsitassarsiortitseqatigiiffinniipput imaluunniit piiaaffimmiillutik.
Tamarmik sumiiffimmut ataatsimut katersorneqartariaqarput
Qillerinermit qaqitat tamarmik pitsaanerusumik nakkutigineqartariaqalersut ilisimatusartut isumaqarput, aamma suut tamarmik ataatsimut katersorneqartariaqartut, ilisimatusartut, oqartussat aamma aatsitassarsiornermik ingerlatsiviit paasissutissat pissarsiariuminartinniassammatigit.
Allaaserisaq tamaat aviisimi Sermitsiami atuaruk.
