- Nunarsuarmioqatigiit Parisimi isumaqatigiissummut ilaasut, Danmark Savalimmiullu ilanngullugit, silap pissusaata allanngornera pillugu, pingaartumik Issitumi allannguutit oqallisileraangatigit matup silataani utaqqisariaqartarpugut.

- Maanna periarfissaqalissaagut, nammineerluta aqqusaakkavut pillugit oqaasertaliissalluta, aamma minnerunngitsumik periarfissaqalerpugut Nunarput akisussaassusilimmik ingerlanneqartoq, aammalu nukissiuutit mingutsitsinngitsut atorlugit nukissiuuteqarnikkut ineriartortitsineq ingerlakkipput, aammalu silap allanngornera pillugu suliassaq pimoorukkipput suleqataarusuttugullu silap allanngornerata kingunerisaanik ajornartoornerit Parisimi isumaqatigiissut aallaavigalugu anigorniarneqarnerini, Kalistat Lund (IA) Sermitsiaq.AG-mut oqarpoq.

Innuttaasunut paasisitsiniaanerit ingerlanneqassapput

Malunnarpoq, innuttaasut ilai arlalissuit toqqissisimanngitsut, maanna nunarput Parisimi isumaqatigiissummut ilannguttussanngormat. Inuit attaveqaqatigiittarfii qissimiinnaraanni qanoq kinguneqassanersoq pillugu oqallinnerit annertuut takussaapput.

Tamakku oqallinnerit ilai pigiliutiinnakkanik isummersortitsipput aammalu ilanngunnitsigut ulluinnarput qanoq sunnerneqassanersoq pillugu taamaassorinninnerit imaaginnavillutik.

Naalakkersuisoq Kalistat Lund tassunga tunngatillugu oqarpoq suliassaqarlutik annertuumik, innuttaasut oqaloqatigalugillu paasitinniarnerinut isumaqatigiissummut ilanngunneq nunatsinnut qanoq isumaqarnersoq:

- Maannakkut suliarput siulleq tassaavoq Naalagaaffiit Peqatigiiffiannut suleqataalerluta ilanngunnissatsinnik pisortatigoortumik saaffiginninnissarput. Tamatuma malitsigisaanik aamma nunatta Parisimi isumaqatigiissummut ilanngunnerata malitsigisassai pillugit innuttaasunut paasissutissiinissaq piareersarneqarpoq. Tassami pingaaruteqarpoq innuttaasut isumaqatigiissut pillugu sapinngisamik annerpaamik qaammaasaqarluarnissaat, Kalistat Lund oqarpoq.

Paasisitsiniaaneq tusagassiuutit assigiinngitsut atorlugit ingerlanneqassaaq, tassa tv-kkut, radiokkut naqitatigut allatigullu innuttaasunut angunniffiusinnaasutigut. Tamakkuli saniatigut Naalakkersuisoq neriorsuivoq sulinerminut atatillugu nunatsinni angalagaangami innuttaasunillu ataatsimiisitsigaangami Parisimi isumaqatigiissut qaqinneqartarumaartoq.

- Assersuutigiinnarlugu ukioru Qaanaaliartussaavunga Pikialasorsuarmi isumaqatigiissut pillugu. Tassani innuttaasut peqatigalugit periarfissaqarumaarpugut Parisimi isumaqatigiissut oqaloqatigiissutigissallugu, Lund Sermitsiaq.AG-mut oqarpoq.

Partiit tamarmik siunnersuummut akuersinerat iluaqutaalluassaaq

Kalistat Lund naammagisimaarinnilluarpoq, Inatsisartuni partiit nagaataatigut ataatsimoorlutik Nunatta Parisimi isumaqatigiissummut ilanngunnissaa taperserlugu taasimmata:

- Assut pitsaavoq partiit tamarmik isumaqatiigissutigimmassuk aqqut taanna atussagipput. Taamaaliornikkut ersersipparput suliaq pillugu ataatsimoorluta, aammalu partiit tamarmik akuersaarnerisigut qulakkeerneqarpoq aalajangerneq "annassinnaasoq" Inatsisartunut qinersisoqaraluarpalluunniit, tamannalu patajaassutsimik ersersitsineruvoq, Lund oqarpoq nangillunilu:

- Pingaaruteqartorujussuuvoq nunarsuarmioqatigiit uagutsinnik naatsorsuutiginnissinnaanerat uagullu nunarsuarmioqatigiinnik naatsorsuutiginnissinnaanerput. Maannami aamma nukissiuutit mingutsitsinngitsut siuarsaavigineqrnissaannut aningaasaliinerit angisoorsuit takkukkaluttuarput, assersuutigiinnarlugu erngup nukinganik nukissiorfissaq Qasigiannguanut Aasiannullu pilersuisussaq sanaartorneqartussaavoq, tamatumalu saniatigut aamma Tasersiaq Tarsartuullu Tasersua erngup nukinganik nukissiorfissuartut suliffissuaqarnermut pilersuisussatut neqeroorutigaagut, Kalistat Lund (IA) oqarpoq nangillunilu:

- Taamaattorli tamakku imminnut akilerlutillu iluanaarutinngunnginneranni, sanaartortitsinerit annertoorujussuit aqqusaaqqqaartussaavagut, annertoorsuarnillu sanaartortitsissagutta aningaasanik milliardilikkaanik atuisussaavugut, tassanilu pisariaqqartittussaassavarput nunarsuarmi aningaasanik taarsigassarsiniartarfiit naatsorsuutigisinnaanissaat, ilaatigut erniakitsunik taarsigassarsiniarfiusinnaasut. Tassunga killikkutta periarfissagut annertunerujussuussapput, takutitsisinnaagutta Parisimi isumaqatigiissut najoqqutaralugu akisussaaffimmik tiguseqataasuulluta, CO2-mik aniatitsinerup annikillisarneranut aammalu inuup pilersitaanik mingutsitsinerup annikillisarneqarnissaannut, Naalakkersuisoq Kalistat Lund Sermitsiaq.AG-mut oqarpoq.