Ulluni kingullerni kitaata sineriaani anorlertarlunilu siallertarlunilu imaliliorpoq, Kujataanilu kallernermik innaallannermillu takutitsisumik Facebookimi videoliaqarpoq.

Kitaata sineriaani sila allanngorartupilussuuvoq, sineriaap ilarujussuani sakkortuumik aporaaffeqarmat, silasiortoq Jeanne Mangerel DMI-mi Kalaallit Nunaanni alapernaarsuisumit nassuiaavoq:

- Kitaata sineriaa sinerlugu Qaanaamut aporaaffik kissartoq ingerlaarpoq, nassuiaavoq.

Tallimanngormat Nuummi aporaaffiup aqquserngit quasarujussuartillugillu sialussuartitsivoq, Kujataanilu aamma anorersuarsimavoq innaallannernik kallernernillu malunnaateqarluni.

Aporaaffik kissartoq avannamut ingerlaartoq

Jeanne Mangerelip kallersimaneranik nalunaarut tupaallaatiginngilaa, nunamili maani qaqutigoortuuvoq, nassuiaavoq.

- Nalinginnaasumik kallernissaanut issippallaartarpoq, silasiortoq oqarpoq.

Arfininngorpat ullup-qeqqata missaani aporaaffik kissartoq Maniitsup avannaaniissaaq, aammalu Upernaviup Ilulissallu akornanni ullumi ataatsip tallimallu akornanni kiassasoq DMI-p ilimagaa. Nuummi arfininngornermi ullup-qeqqanut issileqqippoq, tallimanik issilluni.

Aporaaffik kissartoq avannamut ingerlaqqissaaq, Qaanaallu tungaanut nungukkiartussalluni, Jeanne Mangerel nassuiaavoq:

- Qaanaami 22-t missaannik issippoq, 15-illu missaannik issilissaaq, sulili ukiorpalaassalluni.