Kalaallit Airports: Minnerpaamik timmisartortitseqatigiiffik ataaseq Nuummut timmisartuussisalissaaq
Kalaallit Airportsip naatsorsuutigaa timmisartortitseqatigiiffiit nunanit tamalaaneersut minnerpaamik ataaseq Nuummi mittarfik nutaaq ukiumi nutaami atussagaat.
Kalaallit Airports A/S-imi pisortaaneq Jens Lauridsen oqarpoq nunanit tamalaanit timmisartuutileqatigiiffinnit arlalinnit Kalaallit Nunaat ornigassatut soqutigineqarluartoq.
- Suliffeqarfiit assigiinngitsut 27-t oqaloqatigisimavavut, ilaatigut Routes-imi, sulilu allat oqaloqatigaavut, Jens Lauridsen Sermitsiaq.AG-mut oqarpoq. Routes tassaavoq nunanit tamalaanit peqataaffigineqartoq ataatsimeersuarneq, aqqutinik ineriartortitsisut, timmisartortitseqatigiiffiit mittarfinnillu ingerlatsisut ukiumoortumik naapittarfiat.
Nuummi mittarfik novembarip 28-ani ammarneqassaaq, Ilulissanilu mittarfik qaqugu ammarneqarumaarnersoq suli ilisimaneqanngilaq, sanaartornera kinguaattoorfiungaarmat.
Tigussaasumik aalajangiisoqanngitsoq
- 2025-mi aasakkut, Nuummi mittarfissap nutaap ammarneqarnerata kingorna timmisartuussiffiunerpaami siullermi, minnerpaamik timmisartuutileqatigiiffimmik ataatsimik Nuummut timmisartuussisartumik nutaanik peqalernissarput naatsorsuutigaarput. Suli timmisartuutileqatigiiffiit oqaloqatigaavut, piviusorsiornissamullu piffissanngorpat nalunaarutigissavarput. Maannakkut kikkuuneri itinerusumik oqaatiginianngilarput, pisortaq oqarpoq.
Jens Lauridsenip tamatumunnga atatillugu oqaatigaa nunanit allanit Nuummut Ilulissanullu timmisartuussinerit nutaat amerlassusaat pissutsinit arlalinnit aalajangerneqarumaartoq, mittarfiit takisuut timmisartunik anginerusunik mitsitsisinnaasut kisimik apeqqutaanatik.
- Angalasut Kalaallit Nunaannut mittarfik takuniarnagu tikittanngillat. Nunap neqeroorutigisinnaasai allat tamaasa takuniarlugit tikittarput. Akunnittarfinnik unnuiffissaqanngippat, neriniartarfinnik neriffissaqanngippat, misigisassarsiorfissaqanngippat, angalaarfissaqanngippat allarpassuarnillu neqerooruteqartoqarsinnaanngippat, timmisartortitseqatigiiffiit takornariallu tikinnavianngillat, pisortaq erseqqissaavoq nangillunilu:
Pitsanngorsaanissamut periarfissat
- Tamannalu maannakkut pitsanngorsarneqarsinnaavoq.
Jens Lauridsenip erseqqissarpaa siunissaq ungasinnerusoq eqqarsaatigalugu angallannerup ineriartortinnissaanut “nunatut takornariat amerlanerusut tikilluaqquniarlugit attaveqaatit pisariaqartut ineriartortissinnaanerivut” aalajangiisuusoq.
- Uani erseqqissartariaqarparput nuna tamakkerlugu pineqartoq, mittarfiup pisortaa oqarpoq.
