Qaqortumi mittarfissaq 1799 meterisut tallineqarsinnaasumi inissinneqarsimavoq, kisianni teknikikkut pissutsit arlallit misissorneqaqqaartussaapput. Kalaallit Airports (KAIR), Qaqortumi mittarfiliornermik ingerlatsisoq ilisimatitsivoq.

Kommune Kujallermi borgmesteri, Stine Egede (IA), mittarfissap 30 meterinik tallineqarnissaanut siunnersuummik Naalakkersuisunut tunniussaqarmat, mittarfissap takissusaa pillugu oqallinneq oqallisaaqqilerpoq.

LÆS OGSÅ: Borgmesterip oqallinneq aallarteqqippaa: Qaqortumi 1799 meterimik mittarfimmik maanna kissaateqartoq

Sanaartornermik suliaqartut sumiiffimmiinneranni tallineqarnissaa isumassarsiatsialaasoq, Stine Egede isumaqarpoq, tallineqarneratalu ilaasunut Kujataanukartussanut Nuummi aporfilersuisoqarnissaanik pinngitsoortitsissasoq, taanna tunngavilersuivoq.

Air Greenlandip periarfissaq uppernarsarpaa – nangaassutilimmilli

Mittarfissap takinerusup Københavnimit, ullumikkut Københavnimit Narsarsuarmut toqqaannartumik timmisartortarneq assigalugu periarfissaqartitsinissaa, borgmesterip tunngavilersuutaani qitiuvoq.

Taamaaliortoqarsinnaavorlu, Air Greenland taama oqarpoq, pissutsilli amerlasuut sunniuteqarsinnaasut oqaatigaat:

Narsarsuarmi mittarfik 1.830 meterisut takissuseqarmat, Qaqortumi 1799 meterisut takissusilik ullumikkut periarfissat assinginik peqalissaaq, Air Greenland ilisimatitsivoq.

Kalaallit Airportsimi mittarfiup 300 meterinik takinerusup qanoq akeqarnissaa aalajangersimasumik naatsorsuiffigineqarsimanngilaq. Kisianni tallineqassappat teknikikkut arlalinnik inissiisoqartariaqartoq, KAIR-ip ilisimatitsissutigaa.

Avatangiisinik misissuineq aamma qaqqap qaavinik qaartiterineq

Assersuutigalugu allilerineq imeqarfiup killeqarfiani pissagaluarpoq, taamaattumillu avatangiisinut qinnuteqaammik suliaqartoqaqqaassaaq, tassani pissutsit maleruagassallu qulaajarneqassallutik.

Tamatuma saniatigut mittarfissaq 1.500 meterisut takissuseqartoq ”non precision”-iuvoq, tassani Nuummi Ilulissanilu mittarfissat assigalugit minnermut atortorissaarutit ikkunneqassanngillat.

- Mittarfissaq tallineqassappat atortunik assingusunik atortulersorneqassappat, mittarfeqarfiup eqqaani qaqqaaqqat qaavinik qaartiterisoqartariaqarpoq, nunalu aaqqissorneqarluni, KAIR, Sermitsiaq.AG-mut taama ilisimatitsivoq.

Trafikstyrelse piumasaqaateqaqqissinnaavoq

Mittarfiup atortuinik pitsanngorsaaneq kiffartuussinerup annertussusaanut upalungaarsimanermullu naleqqussarneqassapput, upalungaarsimanermut aputaajaanermullu piumasaqaatit pisariaqartinneqartut malinneqarsinnaaniassammata. Mittarfiup tallineqarnissaa aamma mittarfeqarfiup illutaanik allilerinermik aamma kinguneqassaaq:

- Illutai tunngaviusumi kingusinnerusukkut allilerneqarsinnaanngorlugit ilusilersugaapput, KAIR ilisimatitsivoq, mittarfiullu takissusissaa nutaaq Trafikstyrelsenimit akuerineqartussanngorlugu suliarineqaqqaassaaq, taakkulu allanik piumasaqaateqarsinnaassapput.

Stine Egedep siunnersuutaa pillugu attaveqaasersuutinut naalakkersuisoq, Erik Jensen (S), Sermitsiaq.AG-p oqaaseqartinniarsaraa, kisianni tamanna suli iluatsinngilaq.