KAIR ilisarnaat pillugu: - Isumassarsiatsialak
Nuummi mittarfittaassami, ukioq manna novembarip 28-ani ammarniarneqartumi, biilinut inissiivimmit mittarfittaassap illuutissaanut pisuinnaat ikaartarfeqarnissaanik kommunep isumassarsinera Kalaallit Airports A/S-ip ajunngitsussaqartippaa.
![](/sites/default/files/styles/930x500/public/media/skaermbillede_2023-12-21_kl._07.33.55.png?itok=y-lJzH5i&c=378361af8d386dcb7bb9d426f9913ab4)
Illuliamut pilersaarutaareersumut, sumiiffiup atuuffiinut allanut aammalu ilutsimut pisuinnaat ikaartarfiat tulluarsinnaappat, timmisartumik angalasut – nassatallit - biilinut inissiivimmit mittarfiup illuutaanut qutsissutsimik nikingassutaasumik pisarissersornissaat, Kalaallit Airports A/S-ip ajornartussaqartinngilaa.
Pisuinnaat ikaartarfiat kommunip kisimi suliassaraa, imaluunniit KAIR suleqataassava?
- Soorunami pisuinnaat ikaartarfiat suleqatigiissutaasariaqarlunilu oqaloqatigiissutigineqartariaqarpoq, illuutip ilusaanut sumiiffiullu sannaanut pilersaarutaareersumut Kiss and Fly-qartussamut, taxanut bussinullu inissiivissanut, biilerfissanut ilaanullu ilanngullugit tulluarniassammat, attaveqaqatigiinnermut pisortaq, Mikkel Bjarnø Lund, Sermitsiaq.AG-mut oqarpoq.
Mittarfinnik ingerlatseqatigiiffiup illoqarfiit pingaarnersaata kommuneanik oqaloqatigiissuteqaqqinnissaq qilanaarigaa, taassuma ilisimatitsissutigaa.
Atuisunut piuminarsagaq
Ikaartarfikkoornissaq angalasunut piuminarsagaava?
- Kiss and Fly-p nalaani niutittoqarsinnaavoq, aammalu sivikitsumik inissittoqarsinnaalluni allatullu. Ilaatigut sivisuumik inissittussanut pisuinnaat ikaartarfiat atussaaq, qanorluunniillu tassanngaanniit ingerlasoqartartussaaavoq. Tassani pisuinnaat ikaartarfiat isumassarsiatsialaasinnaavoq, inuimmi aqqusineq qulaallugu ingerlassammata, taamaalillunilu angallannermut iluaqutaasinnaalluni, attaveqaqatigiinnermi pisortaq ilisimatitsivoq.
Ilassuteqarpoq:
- Qulineqarpat (ikaartarfik, aaqq.) anorimut silamullu illersuutaasinnaavoq.
Inissiivimmik illoqassanngitsoq
Issittumi atugassarititat sakkortugaluartut, timmisartorlutik angalasut biilitik illumi inississallugit naatsorsuutigisinnaanngilaat.
- Illu inissiivik suliniummi aningaasaliissutigineqanngilaq, Mikkel Bjarnø Lund naqissusiivoq.
Kalaallit Airports A/S-ip ilassutigalugu ilisimatitsissutigaa, pisuinnaat ikaartarfiat KAIR-imit sanaartorneqaranilu aningaasalerneqassanngitsoq.