Inuusuttut inersimasullu ineriartornikkut akornuteqartunut illuutit Ilulissaniittut nutaamik sanaartorfiusimallutik, sisamanngornermi 16. november atoqqaarfissiorneqarput. 

Illuut ulloq unnuarlu neqeroorutaavoq, Sungiusarfik Ikinngut. Meeqqanut, inuusuttunut, ilinniartitaanermut, kultureqarnermut, timersornermut ilageeqarnermullu naalakkersuisup, Aqqaluaq B. Egedep (IA), Naalakkersuisut sinnerlugit illuut ammarpaa.

- Illuut najugaqartut atugarissaarnerinut pingaaruteqarpoq ineriartornissaannullu periarfissaannik tapersiissalluni. Sungiusarfik Ikinnguteqartillugu innuttaaqataasunut innarluutilinnut amerlanerusunik ininik pitsaasunik tikikkuminartunillu tulluartunik inuiaqatigiit tunniussisinnaanissaannut qaninnerulerput taannalu najugaqartunut sulisunullu ulluinnarni toqqissisimanermik pissarsititseqataassaaq, Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede oqarpoq.

Sammisaqartitsineq ataatsimoornerlu

Illuut nutaaliaalluni Sungiusarfillu Ikinngummi najugaqartut ullut tamaasa pisariaqartitaannut tulluarsagaallutik aaqqissugaasut, Namminersorlutik Oqartussat tusagassiorfinnut nalunaaruteqarlutik allapput.

Najugaqarsinnaasut tassaapput inuusuttut 14-iniit ukiullit qummut.

Sungiusarfik Ikinngut najugaqarfittut immikkoortortamik najugaqartunut 20-nut inissalimmik nutaamik sananermik, illooreersumillu pingaarnermik allanngortiterinermik ilaqarpoq.