Inissiinermut akitsuut: KAIR nipangersimalluinnarpoq
Namminersorlutik Oqartussat ingerlatseqatigiiffiutaata Nuummi timmisartoqarfissap nutaap eqqaani biilinut inissiinermut biilertunut akiliuteqartitsisalerniarnerluni Kalaallit Airportsip oqaatigiumanngilaa.
![](/sites/default/files/styles/930x500/public/media/taxa_mitt_terminal_9zd0059.jpg?itok=oFnDu7WW)
Nuummi mittarfiup nutaap eqqaani biilit inissinnissaat qanoq akisutigissava? Sermitsiaq.AG-p mittarfimmik ingerlatsisoq saaffigimmagu apeqqut tamanna Kalaallit Airportsimit akineqarusunngilaq.
Kalaallit Airportsimi attaveqaqatigiinnermut pisortaq Mikkel Bjarnø Lund naatsumik ima nalunaaruteqarpoq:
“Biilinut inissat allarpassuillu timmisartoqarfissap nutaap ammarnissaanut atatillugu qanittukkut nalunaaruteqassaagut.”
Isertuussineq
Kalaallit Airportsip isertuussinera tupigusuutigineqarsinnaavoq, maannakkummi Namminersorlutik Oqartussat ingerlatseqatigiiffiutaat piginneqataassutsimik politikkianni, immikkoortoq 3-mi, qulequtaqartumik “Ammasuuneq ersarissumillu paasissutissiisarneq”-mik, ima allassimasoqarmat:
- Ingerlatseqatigiiffiup soqutigisaqaqatigiivi ingerlatseqatigiiffimmik siunissamilu qanoq ingerlanissaannik naliliisinnaaqqullugit isummersinnaaqqullugillu ammasuunissaq ersarissuunissarlu pingaaruteqarput. Ingerlatseqatigiiffik soqutigisaqaqatigiillu suleqatigiilluassagunik ammasuusariaqarlutillu ataqqeqatigiilluinnartariaqarput.
Biilertut nalunaaquttap-akunnerani, ullormi, sapaatip-akunnerani immaqalu qaammammi biilinik inissiinerat qanoq akeqassanersoq, aamma sooq Kalaallit Airportsip biilinik inissiinerit akitsuuserniarnerai, Sermitsiaq.AG-p paaserusuppaa.
Tamakku tamarmik akissutissarsineqanngimmata akitsuutit qanoq annertutigissanersut eqqoriaannaasinnaavarput. Inuussutissarsiortut inissiinermut akiliuteqartalertussaasut ilisimatinneqarsimammata, biilertunut akitsuusiinissaat ilimagineqarsinnaavoq.
Taxanik atuisut akitsuuserneqarput
Sermitsiaq.AG ataasinngormat allappoq Nuuk Taxi maajip aallaqqaataaniit timmisartoqarfimmut aallernerit timmisartoqarfimmukaassinerillu tamaasa inissiinermut 10 koruuninik akiliisassasoq. Akitsuut tamanna taxartartut marloriaammik akiligassaraat, tassami akitsuutip nutaap atuutilersinneqarnissaanut aningaasartuutit annertummata.
Danmarkimi mittarfinni biilit inissiiviannut akiliutit assigiinngitsorujussuupput. Pissutsit arlallit apeqqutaasarput. Assersuutigalugu biilinut inissiiviit mittarfiup eqqaaniinneri akinut sunniuteqarpoq. Biilinut inissiivik illuusoq pineqarpat silami biilinut inissiivinnit akisunerusinnaavoq.
Billundip mittarfiani biilinik inissiineq ullormut ataatsimut 80 koruunit 195 koruunillu akornanni akeqartarpoq, biilit qanoq inissinneqarnissaat apeqqutaalluni.