Ilulissani kinguaattoortoqartoq: Ajuusaarnarpoq
Sanaartornerup kinguaattoornera ajuusaarnarpoq, Ilulissanummi toqqaannartumik tikittoqartalernissaanut takornariartitsisut ukiuni arlalinni piareersaaqataaffigisimavagut, Visit Greenlandip pisortaanera oqarpoq.
![](/sites/default/files/styles/930x500/public/media/_v0b6773.jpg?itok=hYM8zzfk&c=2bbf90e597fc6dd8c136b29b4b66cfa2)
Kalaallit Airportsip naatsorsuutigaa Ilulissani mittarfissuaq 2025-mi aatsaat naammassissasoq, avannaani sanaartorneq annertuumik kinguaattoorfiummat. Pilersaarutaasimagaluarpoq Nuummi mittarfissuaq assigalugu Ilulissani mittarfissuaq 2024-mi naammassissasoq.
Kinguaattoorneq pillugu Visit Greenlandimi pisortaq, Anne Nivíka Grødem ima oqarpoq:
Siunissaq ungasinnerusoq eqqarsaatigalugu pilersaarusiorneq
- Takornariartitsinermi ukiut arlallit siumut suliniartoqartarpoq, tassanilu attaveqaatit aalajangiisuulluinnartarput angalanerit qanoq pilersaarusiorneqarnissaanut, inniminnerneqarnissaallu eqqarsaatigalugit. Kalaallit Nunaannut takornariarniartut siumut pilersaarusiortarput, taamaattumillu ilimagineqarsinnaavoq takornariat amerlanerusut Ilulissanut toqqaannartumik angallanneqarnissamik maannakkut qilanaarinnittut.
Visit Greenlandimili pisortaq ima nangippoq:
- Taamaakkaluartoq kinguaattoornerup qanoq kinguneqarnissaa nalilersinnaanngilarput. Soorunami nuna tamakkerlugu suleqatigiinnerit aqqutigalugit tikittarfissat inerisarnissaannut peqataaniarpugut. Aamma qularutiginngilarput nunami timmisartuussinerit attaveqaatinut pioreersunut piumaneqarnermullu naleqqussassasut, tikikkusutat tikikkuminarneroqqullugit.