Attaveqaqatigiittarfiup pingaaruteqartup ingerlaannarnissaata qulakkeernissaa sulissutigineqartoq
Nunat OLT-mi ilaasortat sulinerata ingerlaannarnissaata qulakkeernissaa Kalaallit Nunaata sulissutigaa. OLT-p nunaasa suleqatigiiffiani siulittaasuutitaqarneq Aruba-mut tunniunneqaqqammerpoq.
Nunat EU-mi ilaasortaasunit nunasiaataasimasut EU-mut immikkut ittumik attaveqartut kattuffianni, OCTA-mik taaneqartumi, 2022-mi novembarimiilli Kalaallit Nunaat siulittaasuuvoq.
Siulittaasuuffik Ny Kaledoniamit Kalaallit Nunaata taamanikkut tiguaa, maannalu Arubamut ingerlateqqinneqarpoq, Naalakkersuisut tusagassiuutinut nalunaarummi allapput.
Bruxellesimi ministerit ataatsimeersuarneranni nunanut allanut tunngasunut ministerip Vivian Motzfeldtip (S) peqataaffigisaani tunniussineq pivoq.
Tamatuma saniatigut ataatsimiittoqarpoq, tassanilu politikkikkut sinniisut OCTA-mi ilaasortaasut Europami Kommissioni, EU-p nunai ilaasortaasut allallu naapippaat.
Nunat OLT-mi ilaasortat ikileriangaatsiarsimaneri pillugu nunat EU-mi ilaasortaasunit nunasiaataasimasut suleqatigiiffiani ilaasortat brexit-ip kingorna unammilligassaqarsimasut, Nunanut allanut tunngasunut naalakkersuisup Vivian Motzfeldtip oqaatigaa.
- Nunat OLT-mi ilaasortat attaveqaqatigiittarfiata minnerunngitsumik EU-mut pingaaruteqaqisup OCTA-p sulinerata ingerlaannarnissaata qulakkeernissaa sulissutigissallugu Kalaallit Nunaanit pingaartinneqarsimavoq. OLT-EU-mi oqallitsitsineq naammasseqqammersoq suliniaqatigiiffimmut isumallualersitsivoq, OCTA-mi minnerunngitsumik EU-mi suleqatigisanik ataatsimeeqateqarnigut pitsaasumik ingerlammata, naalakkersuisoq oqarpoq.
