Amerlasuut Eqqartuussivilersuussinerat: Meeqqat pillugit suliani ilaqutariit kalaallit immikkoortinneqarput
Stage Advokatfirmap peqatigiiffiit MAPI Sila 360-lu sinnerlugit ilaqutariit kalaallit immikkoortinneqarnerat pillugu Danmarkip naalagaaffia eqqartuusisunut tunniunniarpaa. Kommunit suli misissuummik akerlerineqaqisumik atuinerat pillugu eqqunngitsumik toqqammaveqarluni angerlarsimaffiit avataannut inissiisoqartartoq isummiunneqarpoq.
Kattuffiit MAPI (Meeqqat Angajoqqaallu Peqqinnissatigut Ikinngutaat) aamma Sila 360 ilaasortatit arlallit Danmarkimi meeqqaminnik pinngitsaaliissummi arsaarneqarlutillu pinngitsaaliissummik meerarsianngortinneqarnerannik nalaataqartut sinnerlugit annertuumik eqqartuussivilersuussinermik aallartitsipput.
Taamak allaaserinnippoq aviisi Sermitsiaq.
Stage Advokatfirma suliamik isumaginnittuuvoq. Aallaqqaammut Danmarkip naalagaaffiata amerlasuunit eqqartuussivimmut tunniunneqarnerani tunngaviusumik suliassanngortitsinermi akeqanngitsumik eqqartuussivilersuussinissaq qinnutigineqassaaq.
– Angajoqqaatut piginnaasanik misissuinernut atatillugu misissuutit tutsuiginanngitsut tunuliaqutaralugit meeqqanik angerlarsimaffiup avataanut inissiisoqarlunilu pinngitsaaliissummik arsaarinnittoqartarnera pisarlunilu ingerlatiinnarneqartoq isumaqarpugut, eqqartuussissuserisoq Jeanette Gjørret, manna tikillugu sullitat arfineq marluk sinnerlugit sulianik ingerlatsisoq oqarpoq.
Allaaserisaq tamaat aviisimi Sermitsiami atuaruk.
