Skip to main content

Aalajangiinissap kinguartinneqarnera pillugu borgmesteri: Innuttaasunik ataqqinninnginneruvoq

Kangerlussuarmi timmisartuussinerup ingerlateqqinnissaa pillugu sooq Naalakkersuisut aalajangiussaqarsinnaannginnersut borgmesterip Malik Berthelsenip paasisinnaanngilaa. Inuussutissarsiornermut pisortap pissutsit naammaginannginnerarpai.

Erseqqippoq Kangerlussuarmi timmisartuussinerup ingerlaannarnissaa Kalaallit Nunaata akilertariaqaraa, taamaattumillu Naalakkersuisut aalajangertariaqarput.

Taama oqarpoq Qeqqata Kommuniani borgmesteri Malik Berthelsen (S), Kangerlussuarmi mittarfissuarmi angallannerup misissorneqarnera kinguaattoormat, misissuinerlu aatsaat ukioq manna naammassippat suliap ingerlateqqinnissaanut aalajangiisoqarsinnaalissasoq saqqummiunneqareersorlu.

Misissuineq marsimi saqqummiunneqartussaagaluarpoq:

- Soorunami kingumut pakatseqqippugut! Isumaqarpunga tamanna Kangerlussuarmut tunngatillugu suliamik pimoorussinnginnermik, Kangerlussuarmilu nunaqartunut Qeqqatalu kommunianut akileraarutitigut aningaasarpassuarnik annaasaqartussamut  ataqqinninnginnermik takutitsinerusoq, taama Malik Berthelsen Sermitsiaq.AG-mut allakkatigut qisuariarpoq nangillunilu:

- Taamaattumik Kalaallit Qallunaallu Naaalakkersuisuisa Kangerlussuarmi najugaqartunut ataqqinninnerminnik takutitsissagunik isumaqatigiissutimik piviusunngortinnissaat piaartumik naammassisariaqalerpaat.  

Arctic Circle Business: Naammaginanngilluinnarpoq

Suliffeqarfiit kattuffiannit Arctic Circle Business-imit aamma aalajangiisoqarnissaa ungasippallaartoq isornartorsiorneqarpoq:

- Naalakkersuisup akissutaa naammaginanngilluinnarpoq. Timmisartuussinerit pillugit misissuineq ukiut arlallit matuma siorna naammassineqareersinnaagaluarpoq, kisianni Nuummi mittarfiup ammarneqarnerata kingorna aatsaat misissuisoqarnissaa naatsorsuutigineqarpoq, Arctic Circle Businessimi pisortaq Jesper Schrøder oqarpoq nangillunilu:

- Kangerlussuarmi innuttaasut inuussutissarsiortullu utaqqineq naammaginngilaat, qaammatit qulit sioqqullugit pilersaarusiornissaminnut periarfissaqannginnamik.

Pisortap isornartorsiorpaa Kangerlussuarmi pissutsit allanngorluinnartussaanerat ilisimaneqartuarsimasoq, Naalakkersuisullu iliuuseqannginnerminni utaqqiinnartut.

Jesper Schrøderip Naalakkersuisut iliuuseqarnissaat ujartorpaa, soorlu Kangerlussuup takornariarfissatut immikkut nittarsaanneqarnissaa, aamma Kangerlussuup inuussutissarsiornikkut siuarsarnissaanut aningaasaliisoqarnissaa.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

MEST LÆSTE

SENESTE NYHEDER